தீபாவளிப் பண்டிகையை முன்னிட்டு, கோலாலம்பூரில் உள்ள  பவிலியன்  கோலாலம்பூர், பவிலியன் புக்கிட் ஜாலில் மற்றும் இன்டர்மார்க் மால்  ஆகிய வணிக வளாகங்கள் பாரம்பரிய அலங்காரங்கள், கலாசார நிகழ்ச்சிகள் மற்றும் சிறப்பு சலுகைகளுடன் பண்டிகைக் கொண்டாட்டங்களை முன்னெடுத்துள்ளன.

பவிலியன்  கோலாலம்பூர் பேரங்காடியில், 'ஒளிமிகு பயணம்' என்ற கருப்பொருளில் இந்திய அரச குடும்பங்களின் கம்பீரத்தைப் பிரதிபலிக்கும் அலங்காரங்கள், வண்ணமயமான ரங்கோலி வடிவங்கள், மருதாணிக் கலை மற்றும் பாரம்பரிய நடன நிகழ்ச்சிகள் இடம்பெறுகின்றன. மேலும், மலேசிய வடிவமைப்பாளர்கள் பாரம்பரிய சேலையை நவீன பாணியில் மறுவடிவமைத்த ஆடை அணிவகுப்பும் நடைபெற்றது. இந்தக் கொண்டாட்டம் அக்டோபர் 22 முதல் நவம்பர் 9 வரை நடைபெறுகிறது.

பவிலியன் புக்கிட் ஜாலில் பேரங்காடியில், ‘மகிழ்ச்சியின் ஒளிகள் – இங்கே ஒன்றிணைவோம்’  என்ற கருப்பொருளில் தீபாவளிக் கொண்டாட்டங்கள் நடைபெறுகின்றன. UCSI குழும மாணவர்கள் உருவாக்கிய ‘1,080 Blessings’ சேலைக் கலைப்படைப்பு, ஒளிரும் யானை அலங்காரங்கள் மற்றும் சிட்டி யுனிவர்சிட்டி மாணவர்கள் வடிவமைத்த கோலங்கள் பார்வையாளர்களைக் கவர்கின்றன. மேலும், இந்திய பாரம்பரிய மற்றும் ஃபியூஷன் நடன நிகழ்ச்சிகளும், தீப விளக்குகளை அலங்கரிக்கும் பயிலரங்கும் இடம்பெறுகின்றன. இந்தக் கொண்டாட்டம் அக்டோபர் 22 முதல் நவம்பர் 9 வரை நடைபெறுகிறது.

இன்டர்மார்க் மாலில், 'வண்ண ஒளிகளின் சங்கமம்' என்ற கருப்பொருளில் அக்டோபர் 21 முதல் நவம்பர் 11 வரை தீபாவளிக் கொண்டாட்டங்கள் நடைபெறுகின்றன. இங்கு, பாரம்பரிய கோலக் கலைஞர் சிரான்ஸ் ஆர்ட்ஸின் கோலக் கலைப்படைப்புகளுடன், பண்டிகைக்கான ஆடைகள், பரிசுப் பொருட்கள் உள்ளிட்டவற்றை வாங்குவதற்கான சிறப்பு விற்பனைச் சந்தையும் இடம்பெறுகிறது.

மேலும், ஒளி, பாரம்பரியம், கலை மற்றும் ஒற்றுமையை முன்னிறுத்தும் இந்தக் கொண்டாட்டங்கள், குடும்பத்தினரும் நண்பர்களும் ஒன்றிணைந்து தீபாவளியை மகிழ்ச்சியுடன் கொண்டாடும் அனுபவத்தை வழங்குகின்றன.