ஐந்து டி20 போட்டிகள், ஐந்து ஒருநாள் போட்டிகள், இரண்டு டெஸ்ட் போட்டிகள் கொண்ட நியூசிலாந்து சுற்றுப் பயணத்தை இந்தியா வெற்றியுடன் தொடங்கியுள்ளது.

கிறிஸ்ட்சர்ச் மைதானத்தில் நடைபெற்ற கடைசி ஓவர் திரில்லரில் இந்திய அணி 4 விக்கெட்டுகள் வித்தியாசத்தில் வெற்றி பெற்றது.

நேற்று முன்தினம் நியூசிலாந்து சென்றடைந்த இந்திய அணி, போதிய தயாரிப்பு இல்லாமலும் பயணக் களைப்புடனும் இன்றைய போட்டியில் களமிறங்கியது.

டி20 உலகக்கோப்பை இறுதிப்போட்டியில் இந்தியாவிடம் தோற்றதற்கு கணக்கு தீர்க்கும் ஒரு வாய்ப்பாக நியூசிலாந்து இந்தத் தொடரைக் கருதியது. அத்துடன் புவனேஷ்வர் குமாரின் கம்பேக் போட்டி என்பதாலும் எதிர்பார்ப்பு அதிகமாக இருந்தது.

ஷிவம் துபே வெளியே, நிதிஷ்குமார் உள்ளே

உலகின் அழகிய மைதானங்களில் ஒன்றான கிறிஸ்ட்சர்ச்சில் டாஸ் வென்ற இந்திய கேப்டன் ஷ்ரேயஸ் ஐயர் பந்துவீச்சைத் தேர்வு செய்தார். பயணக் களைப்பு, போதிய பயிற்சி இல்லாமை குறித்து எந்தப் புகாரும் இல்லை என்று டாஸ் நிகழ்வின்போது அவர் தெரிவித்தார்.

வெஸ்ட் இண்டீஸுக்கு எதிரான கடைசி டி20 போட்டியில் விளையாடிய துபேவுக்கு பதிலாக மற்றொரு ஆல்ரவுண்டர் நிதிஷ் குமார் ரெட்டி அணியில் சேர்க்கப்பட்டார். வேகப்பந்துவீச்சுக்கு சாதகமான மைதானத்தில், நிதிஷ் குமார் ரெட்டி பயனுள்ளவராக இருப்பார் என்று அணி நிர்வாகம் கருதியிருக்கலாம். அதேபோல வேகப்பந்து வீச்சாளர் பிரின்ஸ் யாதவுக்கு பதிலாக மயங்க் யாதவ் சேர்க்கப்பட்டார்.

அணியில் ரச்சீன் ரவீந்திரா இல்லாததால், மிடில் ஆர்டரை வலுப்படுத்தும் விதமாக டேரில் மிட்செல், பெவோன் ஜேக்கப்ஸ் ஆகியோர் நியூசிலாந்து அணியில் சேர்க்கப்பட்டனர். இதனால் கான்வே, ஜோஷ் கிளார்க்சன் ஆகியோருக்கு அணியில் இடம் கிடைக்கவில்லை. நாதன் ஸ்மித், மாட் ஹென்றி, மில்னே, பெர்குசன் என நான்கு வேகப்பந்து வீச்சாளர்களுடன் நியூசிலாந்து அணி களமிறங்கியது.

முதல் ஓவரிலேயே விக்கெட் வீழ்த்திய மயங்க்

நான்கு ஆண்டுகளுக்குப் பிறகு களமிறங்கிய புவனேஷ்வர் குமார், முதல் ஓவரை நல்ல லைன் அண்ட் லெந்த்தில் வீசினார். நான்காவது பந்தில் தொடக்க பேட்டர் டிம் சீஃபர்ட் நூலிழையில் ரன் அவுட் வாய்ப்பில் இருந்து தப்பினார். சுதாரித்து விளையாடிய அவர், புவனேஷ்வர் குமாரின் அடுத்த ஓவரில் 15 ரன்களை குவித்தார். லாங் ஆன் திசையில் விளாசிய பிரமாண்டமான சிக்ஸரும் இதில் அடக்கம்.

அவுட்சைட் ஆஃப் ஸ்டம்ப் லைனில் வைடாக வீசிய அர்ஷ்தீப் சிங்கின் உத்தி கைகொடுக்காத நிலையில், அவருடைய இரண்டாவது ஓவரில், ஆலன் 3 பவுண்டரிகளை விளாசினார். டிம் செய்ஃபர்ட், ஃபின் ஆலன் இணை முதல் விக்கெட்டுக்கு 49 ரன்கள் சேர்க்க நியூசிலாந்து தொடக்கம் சிறப்பாக அமைந்தது. அதிவேகப் பந்துவீச்சாளர் மயங்க் யாதவ், தனது முதல் ஓவரிலேயே சீஃபர்ட்டை ஆட்டமிழக்கச் செய்து இந்தக் கூட்டணியைப் பிரித்தார்.

மறுமுனையில் அதிரடியைத் தொடர்ந்த ஆலன், சுழற்பந்து வீச்சாளர் அக்சர் படேல் தலைக்கு மேல் 2 சிக்ஸர்களை பறக்கவிட, பவர்பிளேவில் நியூசிலாந்து அணி 65 ரன்களை குவித்தது. சிக்ஸர் அடிக்கும் முயற்சியில் அக்சரின் பந்திலேயே திலக் வர்மாவிடம் கேட்ச் கொடுத்து ஆலன் ஆட்டமிழந்தார். அவர் 24 பந்துகளில் 5 பவுண்டரி, 2 சிக்ஸர்களுடன் 45 ரன்களை குவித்தார்.

பேட்டிங்கில் பிரித்து மேய்ந்த பிலிப்ஸ்

மிடில் ஆர்டரில் அனுபவ வீரர் டேரில் மிட்செல் தனது பங்குக்கு 28 ரன்களை குவித்து நியூசிலாந்துக்கு கைகொடுத்தார். ஆனால், பிலிப்ஸின் அதிரடியைக் கட்டுப்படுத்த முடியாமல், இந்திய பந்துவீச்சாளர்கள் தடுமாறினர். இன்னிங்ஸின் 14வது ஓவரில் அக்சர் படேலின் பந்துவீச்சில் அவர் தொடர்ச்சியாக மூன்று பவுண்டரிகளை விரட்டினார். வேகப்பந்து வீச்சையும் சுழற்பந்து வீச்சையும் அவர் திறம்பட எதிர்கொண்டார்.

இறுதிக் கட்டத்தில் பெவன் ஜேக்கப்ஸும் அதிரடி காட்ட, நியூசிலாந்தின் ரன் குவிப்பை இந்தியாவால் கட்டுப்படுத்த முடியாமல் போனது. அவர் 3 சிக்ஸர்களுடன் 16 பந்துகளில் 31 ரன்கள் எடுத்தார். 40 பந்துகளில் 82 ரன்களுடன் ஆட்டமிழக்காமல் இருந்த பிலிப்ஸ், நியூசிலாந்தின் ஸ்கோர் 200 ரன்களை கடக்க முக்கியக் காரணமாக இருந்தார்.

இந்திய அணி தரப்பில் ஒருவர்கூட 10 ரன்களுக்கு குறைவாக விட்டுக் கொடுக்கவில்லை. 20 ஓவர்கள் முடிவில் நியூசிலாந்து அணி, 4 விக்கெட் இழப்புக்கு 225 ரன்களை குவித்தது. டி20 கிரிக்கெட்டில் இந்தியாவுக்கு எதிராக நியூசிலாந்தின் அதிகபட்ச ஸ்கோர் இது.

பவர்பிளேவில் தொடக்க ஜோடியின் அதிரடி

இந்திய அணி 226 ரன்கள் என்ற பெரிய இலக்குடன் தொடங்கிய நிலையில், சஞ்சு சாம்சன் அதிரடி தொடக்கம் கொடுத்தார். ஃபெர்குசன் வீசிய மூன்றாவது ஓவரில் 2 பவுண்டரிகளையும் ஒரு சிக்ஸரையும் விளாசினார். 23 பந்துகளில் அரைசதம் அடித்த அவர், நியூசிலாந்து பந்துவீச்சாளர்களுக்கு சிம்ம சொப்பனமாகத் திகழ்ந்தார்.

அபிஷேக் ஷர்மா 12 பந்துகளில் 29 ரன்கள் எடுத்தார். அவரது இன்னிங்ஸில் 2 பவுண்டரிகளும் 3 சிக்ஸர்களும் இடம்பெற்றன. ஆனால், பவர்பிளேவின் கடைசி ஓவரில் ஆஃப் ஸ்பின்னர் பிரேஸ்வெல்லின் பந்துவீச்சில் அவர் ஆட்டமிழந்தார்.

சஞ்சு சாம்சனும் அபிஷேக் ஷர்மாவும் முதல் விக்கெட்டுக்கு 82 ரன்கள் சேர்த்தனர். முதல் ஆறு ஓவர்களில் இந்தியா ஒரு விக்கெட் இழப்புக்கு 94 ரன்கள் எடுத்தது. வெளிநாட்டு மண்ணில் இந்தியாவின் சிறந்த டி20 பவர்பிளே ஸ்கோர் இது.

10 பந்துகளில் பறிபோன 3 விக்கெட்டுகள்

மறுமுனையில் சாம்சன் தொடர்ந்து அதிரடி காட்டினார். 33 பந்துகளில் 67 ரன்கள் எடுத்த அவர், 203.03 ஸ்ட்ரைக் ரேட்டில் 8 ஃபோர்களையும் 4 சிக்ஸர்களையும் விளாசினார். பவர்பிளேவுக்குப் பின் நியூசிலாந்து சுழற்பந்துவீச்சாளர்கள் திருப்புமுனையை ஏற்படுத்தினர். 10 பந்துகளில் சாம்சன், திலக் வர்மா, இஷான் கிஷன் விக்கெட்களை வீழ்த்தினார்.

இதனால், 112 ரன்களுக்கு ஒரு விக்கெட் என்ற நிலையிலிருந்த இந்தியா, 119 ரன்களுக்குள் 3 விக்கெட்டுகளை இழந்தது. கடைசி 9 ஓவர்களில் இந்திய அணிக்கு 98 ரன்கள் தேவைப்பட்டது. இந்தச் சூழலில் கேப்டன் ஷ்ரேயஸ் ஐயரும் அக்சர் படேலும் கைகோர்த்தனர்.

பந்துவீச்சில் சொதப்பிய அக்சர், 14 பந்துகளில் 24 ரன்கள் எடுத்தார். 3 பவுண்டரிகளையும் 1 சிக்ஸரையும் அடித்த அவர், பெர்குசனின் பந்துவீச்சில் ஆட்டமிழந்தார். மறுபுறம் அதிரடியைத் தொடர்ந்த ஷ்ரேயஸ் ஐயர் நம்பிக்கை அளித்தார். 28 பந்துகளில் 42 ரன்கள் எடுத்த அவர், நியூசிலாந்து கேப்டன் சான்ட்னரின் பந்துவீச்சை விளாசினார்.

இறுதிக் கட்டத்தில் ஆல்ரவுண்டர் நமன் தீர் இந்தியாவுக்கு ஆபத்பாந்தவனாக மாறினார். 17 ஓவர்கள் முடிவில் இந்தியா 197/5 என்ற நிலையில் இருந்தது. கடைசி 18 பந்துகளில் 29 ரன்கள் தேவைப்பட்டன. நேதன் ஸ்மித்தின் ஓவரில் 19 ரன்கள் கிடைத்தது.

ஆனால், ஆடம் மில்னே வீசிய 19வது ஓவரின் முதல் பந்திலேயே 42 ரன்களில் இருந்த ஷ்ரேயஸ் ஐயர் ஆட்டமிழந்தார். அப்போது இந்தியாவின் வெற்றிக்கு 11 பந்துகளில் 16 ரன்கள் தேவைப்பட்டன. அந்த ஓவரின் கடைசி 3 பந்துகளில் நமன் தீர் பவுண்டரி உள்பட 7 ரன்கள் சேர்க்க, கடைசி ஓவரில் 8 ரன்கள் தேவைப்பட்டது.

ஹென்றி வீசிய லோ ஃபுல் டாஸ் பந்தை நமன் தீர், மிட் ஆஃப் மேல் தூக்கியடிக்க ஆட்டம் இந்தியாவின் பக்கம் திரும்பியது. கடைசி 3 பந்துகளில் 2 ரன்கள் தேவைப்பட, ஓவரின் 4வது பந்தை ஷார்ட் பந்தாக ஹென்றி வீசினார். அது நமன் தீரின் பேட்டில் டாப் எட்ஜாகி ஃபைன் லெக் திசையில் சிக்ஸருக்கு பறந்தது. இதன் மூலம் 2 பந்துகள் மீதமிருந்த நிலையில், 4 விக்கெட்டுகள் வித்தியாசத்தில் இந்தியா வென்றது. கிறிஸ்ட்சர்ச் மைதானத்தில் எட்டப்பட்ட அதிகபட்ச சேஸிங் இதுவாகும்.

பவர்பிளேவில் பிடியை விட்ட நியூசிலாந்து பந்துவீச்சாளர்களால் கடைசி வரை மீண்டு வர முடியவில்லை. சர்வதேச கிரிக்கெட்டில் குறைவான அனுபவமே உள்ள நமன் தீர், தனது ஆகச் சிறந்த டி20 இன்னிங்ஸை விளையாடினார். 280 ஸ்ட்ரைக் ரேட்டில் விளையாடிய அவர், 15 பந்துகளில் 42 ரன்கள் குவித்தார்.

ஆட்டம் முடிந்த பிறகு பேசிய இந்திய அணியின் கேப்டன் ஷ்ரேயஸ் ஐயர், தொடக்க வீரர்களின் பங்களிப்பை வெகுவாகப் பாராட்டினார். ஆல்ரவுண்டர் நமன் தீரின் இன்னிங்ஸ் அணியின் வெற்றிக்கு உதவியதாகச் சுட்டிக்காட்டினார்.

தங்களது சிறந்த ஆட்டத்தை வெளிப்படுத்தவில்லை என நியூசிலாந்து கேப்டன் மிட்செல் சாண்ட்னர் தெரிவித்தார். பவர்பிளேவில் இந்திய அணியின் தொடக்க வீரர்களைக் கட்டுப்படுத்த முடியவில்லை என்பதையும் ஒப்புக்கொண்டார். 33 பந்துகளில் 67 ரன்கள் குவித்த விக்கெட் கீப்பர் சாம்சன், ஆட்ட நாயகனாக அறிவிக்கப்பட்டார். இரண்டாவது டி20 போட்டி சனிக்கிழமை (அக்டோபர் 24) இந்திய நேரப்படி மதியம் 12.30 மணிக்குத் தொடங்குகிறது.

- இது, பிபிசிக்காக கலெக்டிவ் நியூஸ்ரூம் வெளியீடு